Large Heading

Utopie

Nämed mich echli i eui Mitti

bin sicher s hät doch nochli Platz für no e Dritti

wür so gern liege zwüsched eune warme Arme

nämed mich nume us Liebe frei frei ohni Erbarme

 

Es git doch soviel wunder, wunderschöni Forme

s git so vil meh als eusi allergschetzte Norme

es Quadrat en Stern es Drüegg passed alli inen Kreis

gsender dänn nid letscht endlich simmer Alli eis

 

Doch mir händ glehrt ständig gäg dr Ander z kämpfe

mi händ gelernt rächne, repetiere doch nöd dänke

dänke so wie mir gern dWält wetted ha

mi säget immer lieber Nei und sälte Ja

 

Und dänn erfinde mer bösi Mächt en stränge Gott

mi sind verhange i abertusig witzige Verbot

und wenn dänn eine glaubt s chönti doch alles andersch si

wiist es Verbot am Bahnhofsplatz fründlich druf hi

 

Bitte da mer dörf nöd sitze

bitte kei Musig imne Tram

alli losed Musig ihri eige

alli hockemer zäme und glich simmer alleige

 

Die tollschte Ideeä di kreativschte Lüüt

zehled oft i eusre liebe Gsellschaft nüt

oke sig Künstler, mira Verrückte, odr Utopist

aber eus sind wichtig Generäl, Bänker und Polizist

 

Ich weiss ja nöd nach was ihr strebed liebi Lüüt

doch ich bin da um s Läbe gnüsse die churzi Ziit

Ich wett kei Gwalt im Fernseh gseh

am schönste wär's s würdsi nöd geh

doch nu wills si git heisst das doch nöd

me dörf nöd zeige glücklichi Lüüt - wil die gits au!

 

 

Ich wett singe singe singe di ganzi Ziit

tanze tanze tanze di ganzi Ziit

liebe liebe liebe liebe liebe läbe liebe läbe liebe di ganzi Ziit

ich bin sicher das bring mi wiit

 

Wänn alli Kräft glichmässig verteilt

passt inen Kreis fasch jedi Form das isch beleit

wänn zwüsche Mänsche Liebi isch bruchts ä kä Kleider wil eh blutt bisch

me mues nid emal rede me cha nu schwige bis alles bald verheilt

 

Di ständig Angscht

di ständig Angscht vorem eifache sii

di ständig Angscht d Ziit seg nid ewig, si zieht verbi

di ständig Angscht du bisch nöd gnueg

di ständig Angscht du wirsch nöd gliebt

 

Doch wännd nöd gliebt wirsch - fang doch sälber ah

gib alles wod häsch – sigs nur es Schmunzle - em fremde Ma

Trau di doch sälber, überlah nid all's irgend'me Gott

ich bin sicher dass sie dVerantwortig nöd eleige träge wott

 

Oh lass eus liebe liebe liebe liebe liebe läbe liebe läbe liebe di ganzi Ziit

ich bin sicher das bring eus wiit!

Photo by LOU